音樂會後感：香港兒歌唱遊大世界

文章簡介：

在00年12月31日，我欣賞了一個兒歌音樂表演：香港兒歌唱遊大世界(活動資料按此)。然後，我在兒歌谷打了幾篇短文，報導這個音樂會和說說自己的觀後感，與谷友分享和討論 (不少兒歌谷的谷友也有去看)。以下的文章是把那幾篇短文稍作整理後結集成一篇文，但當中的口語部份卻沒有改回書面語，保留了新聞組文字的特色 (其實是懶得去改)。 (特此聲明：未曾去過新聞組的網友看後可能不適，網主絕不負責，哈)

仍是這句：歡迎網友看後在 電郵 給我意見、感想或批評。

 

 

 

 

 

文章分整體、場刊和各表演項目的感想三部份。

整體：

司儀：
陳奕(以她為主)：不過不失，有時吸氣聲大左D (傷風？)。
袁鳳瑛：比較放和自然，較陳奕好 (當然佢唔使好似陳奕咁記埋D 兒歌歷史、歌名，輕鬆好多)
合唱團團員：以年紀小的較為可愛和受歡迎。

另外，我覺得最唔好咁樣就成日提住個合唱團，叫現場小朋友參加，
講一兩次就無所謂，講太多就變左Hardsell 喇，有少少好似攪呢個音樂會係為左宣傳個合唱團。

選歌：
選歌方面很好，舊的有泥娃娃、新的有六十份幸福的感覺和陽光中的孩子，
適合唔同年紀的人(甚至兩代添！)
有動畫歌又有中國民謠甚至香港民歌。
非常切合音樂會的主題！

宣傳方面：

其實只係想講一樣野，就係不論場刊、宣傳單張、司儀等介紹歌曲時，
都成日提住‘兒歌金榜’，例如話‘上過兒歌金榜’、‘曾經成為兒歌金榜的冠軍’ 等。
其實就算上過兒歌金榜冠軍，都好普通姐，無乜意思，
唔代表受歡迎，唔代表勁咖喎！ 十首歌有九首半都上過啦！
呢幾句野我諗連細路都呃唔到，但係可能呃到無留意兒歌榜的大人囉，哈哈！
(有D兒歌得過十大兒歌金曲的就反而唔提，怪也怪也)

場刊：

D 基本野好似歌手 / 特別工作人員介紹，節目表等當然有啦， 無乜特別野好講。

歌詞：
場刊有登歌詞，唔錯；仲有埋作曲填詞人名，非常好！
但係就有D 歌詞漏左，有D歌就唱A 語言但就登B 語言的歌詞。
可能係因為好遲先決定到今日唱乜歌，
各位比較返宣傳單張(黃色O個張)、場刊、同埋今日即場有乜歌， 就會睇到當中的分別。

另外，場刊有一篇由韋然寫的文：《香港兒歌小小發展史》
對於我來說，有辛尼哥哥睇係第一開心，而有呢篇野加上聽到司儀介紹兒歌的歷史是第二開心的事。
(而且預料不到場刊會有這篇文章嘛！)


篇野寫得簡單易明，而資料又好珍貴， 睇完呢篇文知左唔少野。

但係有部份資料有少少問題。
(我寫到咁詳細，一來係可以等睇左呢篇文的網友唔會被D 錯處誤導，
二來呢，如果有幸韋然睇到呢段野(弊，班門弄斧添)，
而將來又有機會再用呢篇文呢，可以令篇文更好)

‘八十年代初’那段:
1.‘世界真細小’不是卡通片主題曲， 或者可以用‘IQ 博士’和‘我係小忌廉’做例
2.第三行：退‘郤’

‘九十年代開始’那段:
1.陳松‘玲’
2.‘El didi gaga’呢，應該是九十年代後旬了。
而且那時陳奕的聲勢開始回落(或者比歐倩怡低都未定，不清楚)， 不適合作為例子。
3.其實歐倩怡都可以以兒歌姐姐的身份一提

‘兒歌作者中’那段：
1.世界真細‘少’
2.‘仙樂處處飄’最好講埋係‘仙樂飄飄處處聞’的主題曲。(因為前面的都有寫埋)
3.如果呢段可以加返顧嘉煇(定係輝？)少少資料好D (定係太出名，唔使寫？)

‘提到兒歌的作者’那段：
1.‘大書包’應該是‘我是一個大書包’吧？
2.‘動物奧運會’應該是‘小小運動會’吧？
3.講熊熊經典呢，係咪應該數埋‘小老鼠與大花貓’？
4.蔡更德呢，呢段都無乜介紹，
我諗可以講下佢好積極參加無線的那幾屆‘樂韻兒歌創作大賽’，成績亦很好。
我諗佢的‘如果一打’都算是有心思又受歡迎的兒歌。
(講開無線的‘樂韻兒歌創作大賽’，我覺得韋然篇文都應該講下，
其實我覺得個比賽對當時電視兒歌和唱片公司出兒歌CD有好大影響。)

各表演項目的感想：
表演項目和表演者感想和表演細節

開場：

1. 六十份幸福的感覺
唱：香港童聲合唱團
(下簡稱合唱團)

 
  

一)最早期的兒歌：
(合唱團主唱)
1. 採蓮謠(普通話)
2. 本事(普通話)
3. 泥娃娃(廣東話)

相信大部份谷友都未聽過這幾首歌。
在二十五年前，兒歌都是從中國傳來的(包括這三首)，
其實不能算是香港的兒歌。

泥娃娃在場刊只登了普通話的歌詞，
而沒有韋然的廣東話歌詞。

  

二)小時候的兒歌：
(合唱團，幼兒組，六歲以下)
1. 小時候
2. 媽媽好(普通話+廣東話)
3. 兒童是世界上最快樂的人兒

 

小時候： (我諗以主持陳奕為標準的小時候卦？)

唱每首歌前，有幾個小朋友(好細個咖咋)出來講野，
例如介紹合唱團和多謝觀眾等，好得意！
不過都唔夠之後佢地一面唱一面做動作跳舞咁得意。
有些成員就一直唔郁，有D 就相反，個個企定時就周身郁，哈哈。

當然佢地咁細就記晒D 動作，所以就會有導師在台下做動作俾佢地跟住做的， 到最後一首時，舞步非常之勁，(尤其是個導師！)， D 小朋友都跳到唱唔到歌(有聲帶播)

  
三)廣東童謠：
(合唱團唱)
1. 菊花菊花幾時開
2. 小蚱蜢
3. 狐狸先生幾點鐘

唱歌前，陳奕(司儀)介紹最早期的香港所創作兒歌。
而表演的就是其中三首。

3. 狐狸先生幾點鐘：有兩個小朋友獨唱，
以扮狐狸的小朋友最特出，而扮猴子的小朋友成日無對住個咪唱， 好細聲。

  

四)陳奕唱兒歌：
1. Bala Bala Bu
2. 木頭公仔唔准笑
3. El didi gaga
4. 何家小雞何家猜

1. Bala Bala Bu (無東東，感覺無咁好)

4. 何家小雞何家猜(陳奕自己都記錯歌名，講左兩次‘何家公雞何家猜’)

  

~~~中場休息~~~

 

場外有ALS 和合唱團的CD 賣，以特價發售，
買CD還送一隻英文乜乜CD (聽唔到)，
連陳奕的Bala Bala Bu 都有，五十元一隻，真係抵！

其實在開場前個檔已經開始賣CD。
我在中場休息都有行出去，嘩！真係好多人圍住。
(可能D 觀眾在休息時間無野好做)

我行過個檔時，突然見到韋然在我前面行過，個腦閃過一個撩佢傾契的念頭，但佢鬼知我係邊個丫，太唐突喇，所以好快就自己否決左呢個念頭。

  
下半場：
一)合唱團唱兒歌：
1. 露營歌
2. 歡樂兒童
3. 陽光中的孩子
4. 小小的友情

 

3. 陽光中的孩子(唱完之後段音樂好長，
等我仲以為會繼續唱添)

兩個合唱團團員在唱歌前講開場白講得麻麻地，
無大人的流利，又無小朋友的得意。

  

二)袁鳳瑛 / 合唱團唱歌：
1. 阿花的故事
2. 仙樂處處飄
3. 我是一個稻草人

 

1. 阿花的故事
(佢無唱第二段歌詞，我覺得係佢唔記得歌詞。 如果當日真係太多野要記，所以一早已決定要cut 歌詞，我覺得佢唱少一首動畫歌好過囉。始終阿花的故事係佢的歌，而且歌詞得十二句咁少，唔唱晒實在有點兒那過！)
(另有谷友話阿花好似一出場就即刻死咁，好慘)

2. 仙樂處處飄
(始終都係鐘意舊的編曲多D ，歌詞同太快的拍子夾埋怪怪地)

有個合唱團成員成日掛住同台下的人揮手打招呼，
袁鳳瑛話佢：‘知你多FANS 喇“，好攪笑。

其實有合唱團在場，合唱‘打開心窗’都應該唔錯。
上次在商場睇佢表演，佢又係唱呢三首，
希望佢唔係以後表演都唱死呢三首啦。

  
三)動畫主題曲
GAS/ 陳奕 / 袁鳳瑛
(下面括號表示主唱，而通常其他人都會和唱，或搭口唱幾句)

1. 夢中天使 (袁)
2. 叮噹 (GAS，陳奕)
3. 藍精靈 (陳)
4. 飄零燕 (袁)
5. IQ 博士 (陳，袁)
6. 超人的主題曲 (GAS)
7. 問題天天都多 (陳)
8. 足球小將主題曲 (GAS)
9. 前進啊！Gullliver Boy (GAS)

 

3. 藍精靈 (陳) 無唱到第三段，陳奕成日唱甩咀，又幾次唱錯歌詞。
4. 飄零燕 (袁) 有時唱得太大聲，唱爆咪
5. IQ 博士 (陳，袁) 但袁鳳瑛在後段唱一句唔唱一句，似係唔記歌詞囉，哈哈。
7. 問題天天都多 (陳) 又唱錯歌詞和甩咀。
9. 前進啊！Gullliver Boy (GAS) (兩個女仔介紹歌曲時，好似想講但又講唔出係邊套動畫的主題曲，哈)

卡通歌曲O個部份其實可以做得好D 。 第一當然係記歌詞記熟D ，或者選D 佢地識比較熟的黎唱。(當然可能唔係個個都知佢地唱錯)
另外，歌同歌之間停頓太少(但又唔係話Medoly 喎)，去得太急，兩個女仔又多野講 (叫人拍手之類的野)，又大聲， 遮晒D 前奏、過場的音樂。

突然發現陳奕唱過咁多兒歌，好似未唱過動畫主題曲，
(除左那幾首無PLUG 上兒歌榜的高達某輯的中文版歌)

另外，我覺得袁鳳瑛應該唱‘草原小天使’囉。

  
四)辛尼哥哥和三位朋友

1.跳飛機組曲：
跳飛機 / 數字歌 / 刷牙歌 / 有定時 / 醫生歌 / 郵差叔叔 / 跳飛機
(有D 歌名唔肯定)

2.Do - ra- me (英文歌)
3.溫暖的家
4.學生哥 (其中一位朋友Eddie 主唱)
5.大家跟住唱 (其中一位朋友Eddie 主唱)
6.小小生命

1.跳飛機組曲：
全場最開心就係當然係聽辛尼哥哥唱歌啦！ 可以聽得返辛尼哥哥唱呢D 兒歌真係好難得！雖然佢唱的歌比場刊和宣傳單張上的多，有驚喜， 但都仲係嫌佢唱得太少囉(我太貪心喇)。 其實如果今次無辛尼哥哥，我諗我都唔會俾錢去睇。

音樂會完左之後仲有衝動走上台搵佢傾契添。(但又無膽)

  
最後：全部人大合唱
1. 友誼萬歲(Auld Lang Syne) 唱英文		1. 友誼萬歲(Auld Lang Syne) 唱英文，但場刊得中文版的歌詞

返回童言無忌主頁
聯絡筆者
老孩子的寫作新聞組

老孩子兒歌網
Free Web Hosting